A CONA  di Nino Algeri

Ô Santu d’Assisi, ô povvureddu,

Va ’u meritu d’un tesoru beddu,

Chi tutti si misunu a cupiari,

p’’a nascita d’’u Signuri festeggiari.

Iddu ’u presepiu, pi prima, fici,

lu munnu interu lu benidici.

A tutti i banni , cu carchi varianti

si fa ’u presepiu, e si ntonanu canti.

Cona ’nto Missinisi venia ditta,

na nicchia con cannistru a navetta,

cunzata cu fogghi d’aranci e di lumia

sparaciu niuru e biancu, puru. si mittia.

C’’a mattula supra stu virdi jittata

Si dava l’impressioni d’una nivicata.

Sta nicchia vinia assai abbillita

Cu aranci, mannarina e cutugnata.

Si mittiunu, puru, nuci e nuciddi

Pi fari piluccari ’i cchiu picciriddi.

Cu novi cannili, puru, era parata,

d’’a nuvena, una, pi ogni jurnata.

’U ciaramiddaru c’’a sò ciaramedda

dava alligrizza a sta conicedda.

Pi tradizioni ’u presepiu era chistu,

A mezzanotti nascia Gesù Cristu

’nta stu cannistru a  forma ’i manciatura

chinu di pagghia spinusa e dura.

4° classificato  concorso Fra Urbano della Motta ( Motta Camastra)