DALLA RACCOLTA “SCURA È LA STRATA” - FRANCESCO PINZONE

DALLA RACCOLTA “SCURA È LA STRATA”

FRANCESCO PINZONE

NATALI     

Sonanu li campani di Natali,

sona la ciramedda strati strati:

lu munnu è tuttu ‘mbrogghj e tuttu mali,

lu Bamminu ci appizza li maniati.

Cantanu li pueti l’annu novu,

li so’ giriuni la vita arripigghia;

ognu annu ‘ntra sti munti m’arritrovu

sempri la stissa testa di canigghja.

Nun sacciu mancu chiddu c’haju a diri

nun sacciu mancu chiddu c’haju a fari;

vurria cantari, ridiri, ‘mpazziri,

ma mi cunfunnu d’unni accuminzari.

Passu li jorna sulu e senza abbentu

e  ‘ntro frattemmu ‘ncuverchianu li anni,

scumpari dd’anticchiedda di talentu,

s’ammunseddanu guai, peni ed affanni.

Ma si pensu chi poi nun resta nenti

mettu di banna la malincunia:

pi Natali bivemunni cuntenti

‘na cannata di bonu marvasia.

Natale 1953

CAPU D’ANNU

Cu st’oricchj sintivu lu battagghju

 e visti un vecchiu c’una truscia ‘n coddu

chi fujia pi lu mari si non sbaggju.

Un picciutteddu allegru e spezzacoddu

ci jia dappressu senza ‘ntruppicuna

fistanti, giubilanti e quasi foddu.

Iu lu pigghiavu a corpa di vastuna

 e stetti arzatu tutta la nuttata

taliannu li finestri e li barcuna.

Cadia fridda e ‘ncuttusa la jilata

 Supra la terra silinziusa e scura

e lu sonnu stinnia l’ali di fata.

Li muntagni mittevanu pavura,

unniavanu li lupi. Un lumicinu

‘dduma e s’astuta e nun ci mettu accura.

Un organettu sona accà vicinu

canta l’amanti lu pirdutu amuri:

“Trisolu sciatu, sciamma, astru divinu!”

E’ Capu d’annu. Finarmenti l’uri

tantu disiati vinniru, la festa

s’aspittava cu gioja e cu firvuri…

Ma quantu dolu ancora nun ci resta!

si rinnovanu agurii ed alligrizzi

e la jurnata cuntenta s’appresta.

 ‘Ntra lu fumeri, ‘ntra li gran ricchizzi,

sempri lu stissu e mai la farsa muti,

tempu, tu chi la vampa sempri attizzi

e misuri li seculi a minuti!